حكاية مسجد عمر بن العاص - هل فعلا هو اول مسجد اتبني في مصر ؟

 حكاية مسجد عمر بن العاص

#بودكاست عالاصل دور

مأذن المحروسة

زمان – وفزمن الخلفاء الراشدين – وتحديدا في زمن الخليفة العادل – الفاروق عمر بن الخطاب – بيقترح عليه عمرو بن العاص – القائد الداهية – فتح بلاد مصر – في الاول كان الفاروق مش متحمس – وقلقان من بعد المسافة – لكن قصاد حماس عمرو بن العاص الجارف – واللي كان ليه تجارة في مصر زمان ايام الجاهلية – وزارها كتير – قدر يقنع الخليفة عمر – بتجهيز جيش يتولي قيادته لفتح بلاد مصر

وفعلا يدخل عمرو بن العاص مصر- بمساعدة كبيرة من الاقباط – اللي كانوا مش طايقيين الرومان ومذابحهم الدينية ليهم

يعدي عمرو بجيشه النيل من الجيزة – ويعسكر في ارض فاضية فسيحة – ويحط الخيمة بتاعته عشان يقود منها البلاد

في الوقت دة كان لازم يوصل لاسكندرية عشان هي عاصمة الدولة – ويتم انتصاره – بيتقال انه امر بلم الخيام للرحيل – لكن لقي يمامة معششة عالخيمة بتاعته – فحس ان دي اشارة

وامر الجند بترك الخيمة – وفعلا اتفتحت اسكندرية ورجع الجيش من هناك عشان الخيم حولين خيمة القائد تكتر – وتبدء تتولد عاصمة مصر الاسلامية الاولي الفسطاط – واللي معناها الخيمة الكبيرة

بعد ما استتب الامر للمسلمين في مصر بعد سنتين من المعارك – كان طبيعي ان يفكر عمرو بن العاص في انشاء مسجد للصلاة والعبادة

لكن عكس اللي اغلبنا يعرفه – كان اول مسجد انشئ في مصر – واللي انشأه بردو عمرو بن العاص – كان في محافظة الشرقية حاليا – واسمه مسجد سادة قريش – ودة اتبني اثناء دخول الجيش لمصر من الجهة الشرقية

عمرو بن العاص – يدور علي مكان مميز – فيلاقي مكان قرب النيل – ويعتبر في وسط عاصمته الجديدة الفسطاط – كانت الارض عبارة عن حديقة مملوكة لاحد القادة الفاتحين – هو – قيسبة بن كلثوم – واللي يتبرع بالارض عن طيب خاطر – لبني المسجد

في البداية كانت الارض من الحصي – وكان للمسجد واللي كانت مساحته وقت انشائه – 50 ذراع في 30 ذراع – كان له ست ابواب منتشرف في جميع الجهات – ما عدا جهة القبلة

وكان السقف من جريد النخل – واللي محطوط اصلا علي عواميد من جزوع النخيل

وكان في بير – البير دة كان بيستخدمه المصليين للشرب والوضوء – مكنش في محراب ولا صحن للجامع – واكيد ولا حتي مأذنة – لان المأذن متعرفتش اصلا غير في زمن الدولة الاموية – والمسجد الاموي في دمشق – كان له اول مأذنة في التاريخ

وكان وقتها الاذان بيقام من فوق سطح المسجد

المسجد اتسمي وقتها باسم – مسجد الفتح – والمسجد الكبير – لحد ما جه مسلمة الانصاري – والي مصر في عهد الامويين – واللي جاله الامر من دمشق – ببنا ماذن للجامع – وفي الوقت دة كانت الماذنة عبارة عن شكل مربع مرتفع شوية – وبني اربع ماذن في الاربع جهات

مسجد عمرو بن العاص – اتهد واتبني كذا مرة – منهم اول مرة في عهد قرة بن شريك والي مصر في عهد الوليد بن عبد الملك – واللي زود مساحته وبني محراب – ومنبر خشب ومقصورة

الحقيقة ان في عهود كل الدول اللي حكمت مصر – حصل تجديد للمسجد دة – ودة لمكانته الكبيرة – كاكبر مسجد في مصر الاسلامية

لكن في عهد الوزير شاور – في نهاية حكم الخلافة الفاطمية – يامر شاور بحرق الفسطاط كلها ومن ضمنها مسجد عمرو بن العاص – لانه مش قادر يحميها من هجمات الصليبيين

طبعا اللي متابعينا في بودكاست عالاصل دور – عارفين شاور ودماغه اللي كلها غدر وخيانة

لحد ما يجي صلاح الدين – ويقفل الجامع الازهر – ويجدد مسجد عمرو بن العاص بالكامل – علي احدث طراز من المعمار في وقتها

الحقيقة ان كل مكان بتحط رجلك فيه جوا مسجد عمرو بن العاص – اعرف ان مكانك دة – مش فيه قبلك صحابة افاضل – شافوا وعاصروا وقعدوا – مع رسولنا الكريم

في النهاية – سيدنا عمرو بن العاص – مش مدفون في الجامع بتاعه – لكن له قبر صغير في مسجد مهمل جدا في المقطم - اسمه مسجد عقبة بن عامر الجهني

 

حلقتنا خلصت – يا رب منكنش تقلنا عليكوا

ورمضان كريم

وحوي يا وحوي أياحة .. حتب

 «وحوي يا وحوي اياحه » 

#بودكاست_عالاصل_دور

حد سأل نفسه قبل كده يعني ايه وحوي ياوحوي إياحة

اقولك انا بقي يا سيدي .. في اللغه المصريه القديمه - إياح، معناها، «قمر».. ،  أما كلمة وحوي فدي معناها:  أهلاً.

وحوي يا وحوي أياحة.. حتب

وفأواخر القرن التمن تاشر قبل الميلاد - كانت الدوله المصرية الوسطى اتفككت و أحتلها الهكسـوس و كانت (إياح حتب) مرات ملك البلاد سقنن رع حرضــت جوزها على رفع راية العصيان في وش الغزاه  لكن جوزها مات في بداية الصراع،

فراحت بعده لأبنها الكبير عشان يستكمل مشوار أبوه - لكنه مات هو كمان، اياح حتب متهداش وتقول كفاية جوزي وابني البكري راحوا لأ - الست دي كان عندها عزيمة قوية جدا علي تحرير وطنها - فتدفع إبنها التاني  اللي هو مييين ؟؟

"أحمس" طبعا

وفعلا ينجح احمس في اللي  فشل فيه أبوة و أخوة 

و ينتصر و يطرد الهكسـوس و يحقق الأستقلال لبر مصر.

 إياح، معناها، «قمر».. وحتب معناها، «الزمان»، وبالتالي فالست كان اسمها «قمر الزمان»،

وتقديراً للتضحيات وللدور البطولي لـ«إياحة» اللي هي الست قمر

يخرج المصريين شايلين المشاعل والمصابيح وهما بيهتفوا ليها:

 وحوي وحوي إياحة 

يعني: اهلاً اهلا يا قمر، وبكدا بقت وحوي إياحة، أو أهلاً يا قمر، تعويذة المصريين وشعارهم لاستقبال كل قمر بيحبوه وعلي رأسها: قمر شهر رمضان لما دخل الاسلام 

ولحد العصر الفاطمي ... كان القبطيين او الجبتيين اللي هما المصريين يعني بيخرجوا بالفوانيس في موسم معين لإحياء ذكري جدتهم الملكة اللي طردت الهكسـوس الغزاة

 فبذكاء استغل الفاطميين  الاحتفال السنوي دة و حولوه لأحتفال بقدوم رمضان و رؤية الهلال .

ووحوي يا وحوي إياحة

واقعدوا بالعافية ..

دولة التلاوة - الشيخ : محمد رفعت - صوت الشعب

دولة التلاوة - الشيخ محمد رفعت - صوت الشعب

الاصوات زي الوشوش – لكل صوت منها سحنته الخاصة بيه

ففي اصوات تضايق – وفي اصوات تفرح قلبك – واصوات ترتاح لها – واصوات تخليك غصب عنك – تعشقها

والاصوات زي المعادن – منها الصفيح ومنها الفضة ومنها – اللي له بريق الدهب – وقليل قوي – اللي له رنينه – لكن النادر فعلا ان يكون الصوت من دهب

من الاصوات الدهب دي – صوت الشيخ مصطفي اسماعيل

لكن في وسط الاصوات الكتير اللي بنسمعها – صوت بيقف فريد غريب مبهر

وسر غرابته – انه بيستمد طبيعته من جزور الارض

صوت المرحوم الشيخ محمد رفعت

الشيخ محمد رفعت هو صوت الشعب المصري بجد – من اصوات الشحاتين والمداحين والندابين والبياعين السريحة بيستمد الشيخ رفعت صوته

عشان يخرج مشحون بالالم والامل – مرعوش بالخوف والقلق – عنيف عنف المعارك اللي خاضها الشعب – عريض عرض الحياه اللي بيتمناها

وعشان كدة ربنا سبحانه وتعالي كتب للصوت دة البقاء في قلوبنا رغم طول السنين

اتربي وعاش الشيخ رفعت في حي شعبي بسيط

في حي البغالة في السيدة زينب اتخذنت جوا ودان الطفل الضرير اصوات كتيرة خزنها وعرف يندغها ويهضمها ويطلع منها في النهاية صوته الخالد اللي وصل لاعماق الناس فبكاهم وشجاهم وهزهم هز

ومفيش حاجة تهز اعماق الناس زي الحقيقة والصدق – والشيخ رفعت فعلا كان صادق في انفعاله – وكانت طبقات صوته ونغماته حقيقية واخدها من واقع الناس – من فنونهم – من اسواقهم – من ندواتهم وافراحهم البسيطة – وحزنهم العنيف – ومعاركهم القاسية مع الدنيا

لكن بقي الفنان العظيم الشيخ رفعت – ما اكتفاش بدراسة فنون الناس البسيطة وبس – لا دة اخد كمان من الفن الموسيقي الرفيع – ولما مات ساب وراه ثروة كبيرة من اسطوانات باخ وموزارت وبيتهوفن وباجانيني – وكان الشيخ رفعت بيقضي ليالي رائعة في بيته يسمع العباقرة دول ويستمتع بالنغم الرائع اللي ابدعوه

مكنش صدفة ابدا ان ظهور الشيخ رفعت يكون معاه ظهور للشيخ سيد درويش

لان الشعب في الوقت دة كان اكتمل وعيه ونموه وترجم الوعي دة لثورة 19

وفي خلال الثورة كان سعد زغلول بيمثل روح الشعب الصلبة القوية المصممة عالمشي في طريقها اللي بدأته لحد النهاية

وبقي سيد درويش بيلحن اصوات وهتاف الشعب السياسي والاجتماعي

والشيخ رفعت بيلحن حياة الشعب الروحية

ودي مش مبالغة لان الشيخ سيد والشيخ رفعت كانوا زعما من طراز سعد زغلول

وزي ماتلمت كل طوايف الشعب المصري حوالين سعد

وزي ما اتسلطنت بطرب سيد درويش

اتلمت كمان حوالين الشيخ رفعت بكل طوايفها – ومحصلش ابدا قبل رفعت ان استمع اقباط مصر لقارئ للقران الكريم – ومكنش بس سمع لا – دة كان باعجاب وشغف وبحب شديد

ومش بس كدة لا دة الموضوع فاق الحدود

وفيه حكاية غريبة عن ظابط كندي استغل فرصة وجوده في مصر وطلب من مدير الاذاعة المصرية انه يسهله مقابلة الشيخ رفعت لانه معجب جدا بصوته وقرايته

ولما شافه الظابط بكي – وقال انا مكنتش اعرف انه اعمي – ودلوقتي بس عرفت سر الالم اللي مالي صوته العبقري

دة غير قصة الثورة اللي عملها مستمعين الاذاعة لما عرفوا ان في خلاف بين الشيخ رفعت وادارة الاذاعة – وهددوا انهم مش هيسمعوا الاذاعة تاني ولا يدفعوا الضرايب لو منفذتش الاذاعة طلبات رفعت العظيم

ولا قصة ابخل واغني رادل في العالم المهراجة الهندي عثمان حيدر اباد اللي اللي عرض عالشيخ رفعت انه يجي الهند مع حاشيته ويديله 100 جنيه في الليلة مع تكفله بكل مصاريف الرحلة والاقامة – لكن رفعت يرفض ويفضل انه يحي ليالي الفقرا في مصر بالمجان

الحقيقة محدش يعرف القصص دي حقيقية ولا لأ – لكنها ملهاش غير معني واحد – ان الشيخ رفعت اصبح عند الناس بطل شعبي زي ابو زيد الهلالي وعنترة تتحكي عنه الاساطير والروايات

ولما كان رفعت بيقرا في جامع فاضل باشا – مكنش حد من المستمعين يجرؤ انه يرفع صوته بعبارات الطرب والانسجام زي ما بيحصل دلوقتي مع قراء القران

فن رفعت العالي كان بيجبر الجميع علي الصمت وويقيدهم في مكانهم – ويمكن يتحملوا فوق طاقتهم من ضيق المكان وحرارة الجو عشان يستمتعوا بصوت الشيخ رفعت

ويمكن دة دليل كافي جدا لوحده علي حب الناس لصوت العبقري رفعت ومش محتاج جنبه اي حكايات ولا اساطير

وكل تسجيلات الشيخ رفعت الموجودة دلوقتي مفيش للاذاعة اي فضل فيها – لان كلها من عشاق الشيخ رفعت الناس العاديين واللي مالهومش اي صداقة او معرفة بالشيخ رفعت – واللي كانوا بيسجلوا للشيخ من غير اي هدف غير انهم يحتفظوا بالتراث العظيم دة في بيوتهم – لحد ما اتجمع القران كامل بصوت الشيخ رفعت

ودة اكبر دليل ان الشعب المصري دة من يومه وهو شعب واعي واصيل – اصيل في وعيه – اصيل في تذوقه للفن وارتباطه بالقران واهله

ويمكن حضراتكوا تفتكروا ان حب الناس لرفعت لارتباطهم بالدين – لكن الحقيقة ان في وقت ظهور رفعت لمع اسماء تانية كتير في قراءة القران – لكن اغلبها راح فين – الدهب بس هو اللي بيقعد ويعيش

حتي بعد وفاة الشيخ رفعت وبعد ما ضاع اخلد اعماله وهو صوته – ومتبقاش غير تسجيلات جودتها سيئة جدا – يمكن الجيل الجديد يكره منها صوت الشيخ رفعت اكتر ما يحبه – الا ان الشعب بيظهر وفاء ليه بشكل غير عادي

هنشوف واحد من اكبر جزارين السيدة زينب وهو بيحلف طلاق تلاتة ان الشيخ رفعت مش هيدفن غير في المدفن الفاخر اللي بنهوله – ويجري يشيل جثمانه الطاهر بنفسه لمثواه الاخير

والاف الناس اللي حضرت العزا – ويمكن اغلبهم مشافش الشيخ في حياته – لكن سمعه وعشق صوته

مفتي سوريا لما عرف بخبر وفاة الشيخ رفعت قال وهو دقنه مبلولة بدموعه

رحم الله الشيخ فقد جدد شباب الاسلام بشبابه

ولحد دلوقتي ناس كتير من كل مكان بيروحوا قبر الشيخ رفعت يقروله الفاتحة من سكات ويمشوا

رحمك الله يا شيخ رفعت واسكنك فسيح جناته

لانك فعلا كنت – صوت الشعب

إتفضل قهوة

حكايات .. عالأصل دور

إتفضل قهوة

تعرفوا اننا كمصريين بنستهلك اكثر من 400 مليون فنجان قهوة في السنة الواحدة .. علي فكرة دة معدل مايعتبرش كبير بالنسبة لبلاد تانية كتير

دة غير اننا محترفيين في تسميات انا بعتبرها شديدة الغرابة لكميات السكر في فنجان القهوة .. فغير القهوة السادة والمظبوط والزيادة .. عندنا مثلا قهوة مانو .. وقهوة عالريحة .. وقهوة سرياقوسي .. تحس اننا بنحضر عفريت مش فنجان قهوة

بيرجع معرفة الانسان بالقهوة كنبات للقرن العاشر الميلادي .. ويقال ان اول اللي اكتشفها كان راعي غنم اثيوبي .. فوجئ بان الماعز والاغنام بتاعته لما بتاكل من الشجرة دي .. بتبقي نشيطة وحيويتها بتزيد

فياخد من نفس الثمرة الصغيرة ويندغها .. فيحس بحالة من البهجة والنشاط ..

يجري الراعي علي الدير ويقدم بعض ثمار القهوة لاحد الرهبان هناك .. واللي مايعجبهوش طعمها لكنه يحطه في اناء علي النار لحد ما تتحمص .. ساعتها يطلع منها ريحة حلوة قوي .. ويشمها باقي الرهبان في الدير وتعجبهم .. وساعتها ياخدوا الحبوب المتحمصة دي ويطحنوها ويحطوها في المية السخنة

وهنا بس .. بينتج اول كوباية قهوة عرفها التاريخ

بتوصل القهوة بعدها للجنوب العربي في اليمن وتتزرع هناك – عشان تساعد البيئة الصحراوية والجبال في انتاج البن اليمني . . اللي نكهته لا تقاوم

وتوصل القهوة الي بلاد فارس وكل الدول العربية ومنها لاوروبا وامريكا

لكن القهوة كمشروب ساحر دخل مصر في القرن ال 16 ودة كان عن طريق الطلاب المغتربين من اليمن في الأزهر الشريف .. لاحظ  زمايلهم من المصريين ان الطلاب دول بيشربوا مشروب لونه اقرب للسواد ودة قبل المذاكرة وقبل الصلاة وكان بيساعدهم علي السهر وقوة التركيز

طبعا المصريين بفضولهم المعتاد حبوا يجربوا المشروب الجديد .. وكانت النتيجة انه عاجبهم جدا وبدئوا ينشروه بين زمايلهم واهلهم ومعارفهم

عشان يلتقطها المتصوفة و.. ويشربوها في حفلات الذكربتاعتهم وينشروها بين اتباعهم .. دة غير انهم يدعوا بانها بتوصل للعلم النوراني

ومن هنا بيجي حكاية قراية فنجان القهوة بعد شربه

وبدأت القهوة تنتشر في مصر بسرعة رهيبة .. ودة لتوغل الطرق الصوفية وانتشارها بين المصريين .. وبدأ المصريين يتاجروا فيها ويقدموها في اماكن جلوسهم المعتادة ...

وكان الناس يقولوا هنروح لمكان الشخص الفلاني عشان نشرب القهوة ... ومع الوقت بقت هنروح القهوة

لكن رجال الدين قابلوا القهوة بمعارضة شديدة جدا .. سنة 1572 عمل أحد فقهاء المذهب الشافعي .. وهو الفقيه أحمد بن عبد الحق السنباطي حملة عنيفة ضد المشروب الجديد .. ودة كان لما طرح عليه أحد السائلين سؤالاً بيقول

: "ما رأيك يا مولانا في المشروب الذي يدعى قهوة و ما ينجم عنه من نتائج وعواقب فاسدة؟" ،

عمنا الشيخ سمع السؤال من هنا وأفتى بتحريمها من هنا   .. وهو لا كان عمره شرب القهوة ولا شافها اصلا

كل الموضوع انه عرف ان لها تاثير علي العقل والنشاط البدني .. مش مهم بقي التاثير دة سلبي ولا ايجابي ..

وبالتالي قامت الدنيا عالقهوة واللي بيشربوها واللي بيبعوها !!

وعلي نص سنة 1572 أدت خطبة لأحد الأئمة الموالين للفقيه احمد السنباطي عن القهوة  .. إلى هياج شعبي ضدها ،

و أصابت عدوى التحريم عموم القاهرة، ..  لدرجة انهم حطموا المقاهي كلها .. وعاشت القاهرة حالات شغب غير عادية

وفي نهاية سنة 1572 صدرت فتوي بالقاهرة تقضي بمنع المنكرات والمسكرات والمحرمات،..  وبغلق أبواب الحانات والخانات، ..  ومنع استعمال القهوة والتجاهر بشربها، .. وهدم كوانينها وكسر أوانيها ،..

ولتنفيذ الحكم .. كان العسس بيفحصوا البيوت ويكسروا أواني القهوة ويقبضوا علي اي حد بيشربها .. زيه زي اللي بيشرب خمرة والعياذ بالله

تجار البن و منتجي القهوه و البياعين .. ارسلوا وفد للشيخ احمد السنباطي يطلبوا الرجوع عن الفتوة ،..  فكان رده : ما دام القهوه بتؤثر في العقل ايجابا او سلبا فهي حرام !!

طيب يا مولانا ..

قامت معركه حامية الوطيس بين مؤيدي الشيخ و فتواه و بين التجار و مؤيديهم من البياعين ، و يموت احد مؤيدي التجار ،..  يهرب الشيخ ومؤيديه لمسجد قريب ، .. ويتحاصر هناك .. ،

التجار يقوموا بثورة واعتصام كبير .. واول ما يجي الليل يرسلوا واحد منهم  لاحضار بطاطين و عمل صوان باعمده .. و نكاية في مؤيدي الفتوه .. قام التجار و وزعوا مشروب ساخن علي كل اللي في الصوان .. علي روح القتيل ، كان .. قهوة سادة بدون سكر !!

استمر الحصار تلات ايام مع استمرار حالة الفوضي و الشغب حتي وصل امر الاضطرابات الى السلطان العثماني .. والي قام بتعيين مفتي جديد .. اصدر فتوى جديدة بعدم حرمة شرب القهوة .

اعتبر التجار ومؤيدي شرعية شرب القهوه ان التغيير دة .. انتصار لهم ولأرواح شهداء القهوة .. وساعتها وزعوا علي كل الناس قهوة .. سكر زيادة ،

و اتسمي مشروب البن .. بالقهوه التركي ،... ربما لان من افتى بجوازها هو مفتي السلطان العثماني .

و بكدة أصبحت القهوة من حادث جلل الى عادة عند اهالي تجار البن في القاهرة ثم الي كبار الاعيان ثم الي اقاليم مصر كلها ...، فكان و لا يزال أي ميتم يقام له صوان ،.. يقدم للمعزيين القهوة الساده !!!

وانشد الشعراء قديما في مدحها

الشاعر إبراهيم ابن المبلط  في القرن الستاشر بيقول

أرى قهوة البّن في عصرنا ** على شربها النّاس قد أجمعوا

وصارت لشـرابها عـادة ******** وليست تضـرّ ولا تنفـعُ.
و الشيخ محمد البكري الصديقي، يقول:

أقولُ لمن ضاقَ بالهمّ صدرُه **** وأصبحَ من كثر التشاغل في فكرِ

عليك بشرب الصالحين فإنه *** شرابٌ طهورٌ سامي الذكرِ والقدرِ

فمطبوخ قشر البن قد شاعَ ذكرُه ** عليك به تنجُو من الهمّ في الصدرِ.

التجار المصريين كانوا بيصدروا البن اليمني لكل اسواق اوروبا وامريكا .. وكمان بيستوردوا البن الامريكي الردئ ويخلطوه احيانا بالبن اليمني عالي الجودة ويبعوه بسعر اقل

وانتشرت القهاوي في مصر المحروسة .. ومن القهاوي الشعبية .. لقهاوي الخواجات زي قهوة متاتيا .. لمقهي ريش المشهور برواده من المثقفين والمبدعين

لحد ما وصلنا لعصر جروبي وبعده كوستا كافيه وستار باكس

واقعدوا بالعافية

حكاية الحوض المرصود

شوف الحلقة عاليوتيوب من هنا دوس بسرعة  

وتقدر تسمعها علي منصة بوديو من هنا دوس واسمع

مش غريب شوية اسم الحوض المرصود دة؟!!

  يعني تحس انه جاي من عوالم ما وراء الطبيعه والسحر الاسود

 طب ايه اصل الحكاية وجه منين اسم الحوض المرصود

مبدأيا للي ميعرفش احنا نقصد مستشفى الحوض المرصود واللي موجودة في حي السيدة زينب بالقاهرة

كان موقع المستشفى الحالي قصر لنائب الملك الناصر محمد بن قلاوون وكان اسمه قصر "بقتمر الساقي"، واللي وصفه شيخ المؤرخين العرب أحمد بن علي المقريزي بأنه أعظم مساكن مصر، وأحسنها بنيانا، ثم تحول المبنى إلى مصنع للنسيج ثم إلى سجن الحوض المرصود، ثم إلى تكية ثم مستشفى الحوض المرصود لعلاج الأمراض السرية سنة 23 ثم مستشفى الحوض المرصود لعلاج الأمراض الجلدية والتناسلية سنة 43

إلى أن أصبح اسم المستشفى دلوقتي "القاهرة للأمراض الجلدية والتناسلية ودة كان سنة 1979"

حكاية الحوض المرصود

شوف الحلقة عاليوتيوب من هنا دوس بسرعة  

وتقدر تسمعها علي منصة بوديو من هنا دوس واسمع

واصل الحكاية يا سيدي ان في عهد كافور الأخشيدي أخر حكام الدولة العباسية في مصر عثر قرب شط النيل في منطقة السيدة زينب علي تابوت من حجر الصوان الاسود طوله ازيد من اتنين متر ونص وعرضه متر ونص وارتفاعه حوالي اتنين متر .. وطبعا ابعاد زي دي من الحجر الصوان معناها انه تقييل جدا..

التابوت دة كان مغطي من الداخل والخارج بنقوش فرعونية غريبة

 واللي عرفنا بعد كدة انها نقوش جنائزية

كافور الاخشيدي طلب من العلماء في عصره انهم يفكوا طلاسم النقوش دي لكن معرفوش .. الملاحظة الغريبة ان في كل التدوينات العربية زي المقريزي وابن اياس اللي بتحكي القصة دي.. مبتذكرش كلمة تابوت لكن يبدو ان الأمر بالنسبة للعرب جميعا بدا وكانه مجرد حوض .. حوض من الحجر واللي منقوش عليه نقوش فرعونية من مصر القديمة .. تدور الايام وعمنا كافور ينسي الموضوع ..

لكن الاسطورة بتقول  .. ان المصريين الجمال يحولوا التابوت لمركب يعدوا فيها في النيل .. طبعا ماتسالنيش ازاي مركب من الحجر الصوان بالحجم والكتلة دي تعوم ومتغرقش في لحظتها ..

لكن الاسطورة اللي ذكرت في الخطط المقريزية واكد عليها ابن اياس ان الحوض استعمله المصريين لعبور النيل لكن بشرط .. ان اللي يركب فيه يكون عددهم اربعة بس .. ولو ركب الخامس هيبطل السحر ويغرق باللي فيه !!

كافور لما بيعرف اللي حاصل بيقرر انه يتحدي الاسطورة ويركب 5 رجال في الحوض عشان يعبر بيهم النيل ..

كان فاضي قوي عمنا كافور الاخشيدي دة .. سايب البلد تضرب تقلب .. وازمة اقتصادية طاحنة .. ومهتم بتابوت قديم واسطورة اغرب

ماهو عشان كدة دولته هتزول .. وهتدخل مصر جيوش جوهر الصقلي تحت الحكم الفاطمي .. زي ما عرفنا في الحلقة اللي فاتت . ابقوا شوفوها من هنا 👇👇👇

كان في الأصل حلواني

رابط الحلقة علي منصة بوديو للاستماع الي البودكاست من هنا

لكن الحوض مايتحركش باللي راكبينه ويغرق في مكانه علي شط النيل

ايه دة هي الاسطورة كانت بجد ولا ايه ؟؟!! ... الحجر دة فعلا كان بيتحرك في النيل ؟؟!! .. عموما دة اللي ذكره المقريزي وابن اياس عن الفترة دي

حكاية الحوض المرصود

شوف الحلقة عاليوتيوب من هنا دوس بسرعة  

وتقدر تسمعها علي منصة بوديو من هنا دوس واسمع

تمر الايام ويمشي الاخشيدي ويجي الفاطميين والايوبيين وبعديهم المماليك .. وفعصر السلطان الناصر بن قلاون يجي نائبه الامير علم الدين سنجر الجاولي واللي كان مملوك لاحد امراء بيبرس واترقي بعد كدة واصبح امير ونائب للسلطان

ودي فرصة بقي عشان نحكيلكوا نبذة صغيرة كدة عن الامير سنجر واللي حياته مليانة بالحكايات والحواديت الغريبة

سنجر اول ما جه مصر كطفل مملوك كان معاه مملوك تاني اسمه سلار .. عاشوا مع بعض واتعلموا واتفوقوا في الجندية واترقوا في المناصب سوا في عصر قلاوون – ونشأت مابينهم صداقة يتضرب بيها المثل

وسلار دة .. كان في زمنه من اغني الاغنياء وكان بتقال عليه قارون عصره .. وفعهد الناصر بن قلاون .. يغضب علي سلار ويامر بان تتم الحوطة علي امواله .. وساعتها يكتشفوا كنوز علي بابا اللي مالهاش اول من اخر .. ويموت سلار من الجوع في زنزانة مساحتها متر في متر  وهو مخازنه  فيها قمح وغلال تكفي مصر المحروسة لمدة سنة كاملة

ساعتها الناصر بن قلاون يحس بالندم ويامر صديق سلار صاحبنا سنجر الجاولي انه يدفنه دفنة لائقة به

وهنا تطلعلنا تحفة معمارية غاية في الابداع وهي مسجد ومدرسة سنجر الجاولي بقلعة الكبش 

ودي حلقة كاملة عن مسجد سنجر الجاولي

تقدروا تشوفوها من هنا

او تسمعوها من هنا

او تسمعوها من هنا

ودي عبارة عن ساحة مسجد وقبتين جنائزيتين من الحجر وجنبهم مأذنة غاية في الابداع .. القبة الاولي يتدفن فيها صاحبنا سلار .. والتانية هتكون لصديق عمره سنجر الجاولي .. والمكان موجود الي الان شاهد علي عظمة الفن المعماري المملوكي

نرجع لمرجوعنا الاولاني..  في اثناء بنا المسجد .. تطلع في دماغ عمنا سنجر دة انه يطلع التابوت العجيب من الميه ويحطه قدام السبيل بتاعه في قلعة الكبش – عشان يملاه ميه والناس تشرب منه

تخلص لحد هنا الاسطورة ؟!! .. ابدا .. بقيت الكلام هيحكيهولنا الرحالة العثماني اليا جلبي والمهووس بالاساطير واكتشاف اصولها – امسك نفسك كدة -  المياه مبتنقصش من الحوض ؟!!!!

يعني ايه الكلام دة ؟!! .. الحوض يشرب منه الناس والحيوان ماء زلال طول الوقت ولا ينقصش .. ومحدش عارف بيجي منين !! .. وساعتها يتسمي بالحوض المرصود

مش بس كدة المصريين بخيالهم الكبير .. يأكدوا ان اللي بيشرب من المياه دي بيشفي من الالام ؟!! .. الام العشق والهوي وفراق الاحباب .. وهنا ياخد اسمه التاني ينبوع العشاق

وبنشوف في صور المستشرق الايطالي لويجي ماير المصريين وهما واقفين في طابور طويييل قدام الحوض المرصود عشان ياخدوا شربة من ميته المسحورة اللي بتشفي الالام ومش عارفين بتيجي منين

الحقيقة ان الاساطير مابتنتهيش حوالين التابوت دة ..ويمكن منها اسطورة اكتر غرابة بتقول .. ان في يوم عاشورا .. بيظهر جان موكل بحراسة السحر اللي موجود في الحوض

وان الجان دة بيظهر علي هيئة البشر العاديين .. وان اللي حظه حلو وبيعدي من قدامهم في اليوم دة وهو شاري خضار او فاكهة .. بيشوفهم دهب في ايده .. لكن الخسارة انه اول ما بيبعد عن الجن دة بيرجعوا لطبيعتهم تاني .. خضار وفاكهة عادية

وتمر الايام تاني وتيجي الحملة الفرنسية ويجي اخونا نابليون بونابرت ومعاه علما من كل صنف ولون .. وعلي قد ما الحملة دي كانت ليها فظائع ومزابح وفجر في بر مصر المحروسة .. الا انها كان ليها الفضل في كسر شوكة المماليك اللي كان ساعتها انتهي عصرهم الذهبي واللي متبقي منهم مهمته الاساسية هي نهب المصريين لحسابه وحساب الخليفة العثمانلي ..

حكاية الحوض المرصود

شوف الحلقة عاليوتيوب من هنا دوس بسرعة  

وتقدر تسمعها علي منصة بوديو من هنا دوس واسمع

العلما الفرنساويين  يفكوا طلاسم اللغة الهيروغليفية من حجر رشيد ويأكدوا ان الطلسم اللي علي الحوض المرصود عبارة عن تعاويذ جنائزية وان التابوت بيرجع عصره للاسرة ال 26

الفرنسيين ياخدوا حجر رشيد وكمان التابوت المسحور معاهم فرنسا .. لكن الانجليز المنتصريين في معركة ابو قير يشترطوا ان حجر رشيد والتابوت يتسلموا لهم في لندن .. كجزء من الغنائم

ودة طبعا قبل ما يحتلوا مصر بعد كدة .. وينقوا ويختاروا علي مزاجهم من خير مصر واثارها

وفعلا من ساعتها والتابوت المسحور في المتحف البريطاني ..

ويتبقي لنا هنا في مصر .. المستشفي صاحبة الاسم العجيب واللي اشتهرت بخبرة اطبائها في علاج الامراض الجلدية .. وقبل كدة ايام ما كانت مستشفي للامراض السرية .. كان موكل ليها الكشف واستخراج الرخصة الصحية للبغاية .. دة طبعا ايام ما كانت دي شغلانة ولها قانون بيحكمها ..

ويتبقي لنا كمان الحكايات والاسطورة .. والسعي لاسترجاع تاريخنا واثارنا المنهوبة من طوب الارض

وياما اثار كتير لينا هنا وهناك لا نعرف تاريخها ولا حكايتها اللي فوق الخيال

                                                    واقعدوا بالعافية

حكاية الحوض المرصود

شوف الحلقة عاليوتيوب من هنا دوس بسرعة  

وتقدر تسمعها علي منصة بوديو من هنا دوس واسمع